ਅੱਜ ਮਾਂਘ ਮਹੀਨੇ ਦੀ ਯਾਰੀ ਵੇ

اجّ مانگھ مہینے دی یاری وے۔کیوں بیٹھیں یار وساری وے۔

آئی موسم چیتر بہاراں۔سنگیاں سرتاں ملیاں یاراں۔

جوبھن لہریں تار متاراں۔ہک میں مفت ازاری وے۔

سئیاں دھانون گاوݨ گانون۔سہجے ہار شنگار سہاون۔

مانگ بݨاون دھڑیاں گوندھانون۔میں سر ڈکّھڑے باری وے۔

سرخی کجّلا میندی سونہدی۔ہر ہک اپنے ڈھول نوں مونہدی۔

میں مٹّھڑی غم لٹڑی لونہدی۔کردی لکّھ لکّھ زاری وے۔

جیور پاون بیڑے لاون۔کنتھ رجھاون سیجھ سہاون۔

بانہ سراندی ور گل لاون۔میں ہکّ سولاں ماری وے۔

رتّ سوہݨی تے وقت سکھیلے۔انگن سہیلے گھر البیلے۔

میکوں وی رب رانجھن میلے۔قسمت ڈیوم واری وے۔

گل پھل دھجرا جوڑ ڈکھاوم۔بلبل بھورے خوشیاں پاوم۔

ول ول ہسرت ماڑے آوم۔پل پل چبھم کٹاری وے۔

اجّڑے سہرے ہار کماݨے۔ناز نواز دے ٹول وہاݨے۔

گزرے سارے ماݨے تراݨے۔لگّڑی شہر کھواری وے۔

راتیں نندر ن ڈینہ قرارے۔ہر ہر ویلے دار مدارے۔

تول نہالی ڈسّدی دارے۔تتڑی اوڑک ہاری وے۔

بانہ چڑیلی سکّ سکّ ہٹڑی۔گل ن لاوے ڈیندا پٹھڑی۔

پیت کللڑی ریت اپٹھڑی۔ڈٹھڑی یار دی یاری وے۔

ماہی مٹّھڑا گل نا لاوم۔گانے گہݨے کھاوݨ آوم۔

باس گلاں دی ساہ مونجھاوم۔ساڑے بعد بہاری وے۔

درد اندوہ تے روم کشالے۔سوز پجّالے اکّھیاں نالے۔

شالا یار فرید سنبھالے۔ٹالم مونجھ مونجھاری وے۔

ਅੱਜ ਮਾਂਘ ਮਹੀਨੇ ਦੀ ਯਾਰੀ ਵੇ।ਕਿਉਂ ਬੈਠੀਂ ਯਾਰ ਵਸਾਰੀ ਵੇ।

ਆਈ ਮੌਸਮ ਚੇਤਰ ਬਹਾਰਾਂ।ਸੰਗੀਆਂ ਸੁਰਤਾਂ ਮਿਲੀਆਂ ਯਾਰਾਂ।

ਜੋਭਨ ਲਹਿਰੀਂ ਤਾਰ ਮਤਾਰਾਂ।ਹਿਕ ਮੈਂ ਮੁਫ਼ਤ ਅਜ਼ਾਰੀ ਵੇ।

ਸਈਆਂ ਧਾਂਵਿਨ ਗਾਵਣ ਗਾਂਵਿਨ।ਸਹਿਜੇ ਹਾਰ ਸ਼ਿੰਗਾਰ ਸੁਹਾਵਿਨ।

ਮਾਂਗ ਬਣਾਵਿਨ ਧੜੀਆਂ ਗੁੰਧਾਂਵਿਨ।ਮੈਂ ਸਿਰ ਡੁੱਖੜੇ ਬਾਰੀ ਵੇ।

ਸੁਰਖ਼ੀ ਕੱਜਲਾ ਮੈਂਦੀ ਸੋਂਹਦੀ।ਹਰ ਹਿਕ ਅਪਨੇ ਢੋਲ ਨੂੰ ਮੋਂਹਦੀ।

ਮੈਂ ਮੁੱਠੜੀ ਗ਼ਮ ਲੁਟੜੀ ਲੋਂਹਦੀ।ਕਰਦੀ ਲੱਖ ਲੱਖ ਜ਼ਾਰੀ ਵੇ।

ਜੇਵਰ ਪਾਵਿਨ ਬੀੜੇ ਲਾਵਿਨ।ਕੰਥ ਰਿਝਾਵਿਨ ਸੇਝ ਸੁਹਾਵਿਨ।

ਬਾਂਹ ਸਿਰਾਂਦੀ ਵਰ ਗਲ ਲਾਵਿਨ।ਮੈਂ ਹਿੱਕ ਸੂਲਾਂ ਮਾਰੀ ਵੇ।

ਰੁੱਤ ਸੋਹਣੀ ਤੇ ਵਕਤ ਸੁਖੇਲੇ।ਅੰਗਨ ਸਹੇਲੇ ਘਰ ਅਲਬੇਲੇ।

ਮੈਕੂੰ ਵੀ ਰੱਬ ਰਾਂਝਨ ਮੇਲੇ।ਕਿਸਮਤ ਡੇਵਮ ਵਾਰੀ ਵੇ।

ਗੁਲ ਫੁਲ ਧਜਰਾ ਜੋੜ ਡਖਾਵਿਮ।ਬੁਲਬੁਲ ਭੌਰੇ ਖੁਸ਼ੀਆਂ ਪਾਵਿਮ।

ਵਲ ਵਲ ਹਸਰਤ ਮਾੜੇ ਆਵਿਮ।ਪਲ ਪਲ ਚੁਭਿਮ ਕਟਾਰੀ ਵੇ।

ਉੱਜੜੇ ਸਿਹਰੇ ਹਾਰ ਕੁਮਾਣੇ।ਨਾਜ਼ ਨਵਾਜ਼ ਦੇ ਟੋਲ ਵਹਾਣੇ।

ਗੁਜ਼ਰੇ ਸਾਰੇ ਮਾਣੇ ਤਰਾਣੇ।ਲੱਗੜੀ ਸ਼ਹਿਰ ਖਵਾਰੀ ਵੇ।

ਰਾਤੀਂ ਨਿੰਦਰ ਨ ਡੇਂਹ ਕਰਾਰੇ।ਹਰ ਹਰ ਵੇਲੇ ਦਾਰ ਮਦਾਰੇ।

ਤੋਲ ਨਿਹਾਲੀ ਡਿੱਸਦੀ ਦਾਰੇ।ਤਤੜੀ ਓੜਕ ਹਾਰੀ ਵੇ।

ਬਾਂਹ ਚੁੜੇਲੀ ਸਿੱਕ ਸਿੱਕ ਹੁਟੜੀ।ਗਲ ਨ ਲਾਵੇ ਡੇਂਦਾ ਪੁਠੜੀ।

ਪੀਤ ਕੁਲਲੜੀ ਰੀਤ ਅਪੁਠੜੀ।ਡਿਠੜੀ ਯਾਰ ਦੀ ਯਾਰੀ ਵੇ।

ਮਾਹੀ ਮਿੱਠੜਾ ਗਲ ਨਾ ਲਾਵਿਮ।ਗਾਨੇ ਗਹਿਣੇ ਖਾਵਣ ਆਵਮ।

ਬਾਸ ਗੁਲਾਂ ਦੀ ਸਾਹ ਮੁੰਝਾਵਮ।ਸਾੜੇ ਬਾਦ ਬਹਾਰੀ ਵੇ।

ਦਰਦ ਅੰਦੋਹ ਤੇ ਰੋਮ ਕਸ਼ਾਲੇ।ਸੋਜ਼ ਪੱਜਾਲੇ ਅੱਖੀਆਂ ਨਾਲੇ।

ਸ਼ਾਲਾ ਯਾਰ ਫ਼ਰੀਦ ਸੰਭਾਲੇ।ਟਾਲਿਮ ਮੂੰਝ ਮੁੰਝਾਰੀ ਵੇ।

ajj mangh mahine di yari ve.kiun baithin yar vasari ve.

aaee mausam chetar baharan.sangiaan suratan miliaan yaran.

jobhan lahirin tar mataran.hik main mufat azari ve.

seeaan dhanvin gavan ganvin.sahije har shingar suhavin.

mang banavin dharriaan gundhanvin.main sir dukkharre bari ve.

surakhi kajjala maindi sonhadi.har hik apane dhol nun monhadi.

main muttharri gham lutarri lonhadi.karadi lakkh lakkh zari ve.

jevar pavin birre lavin.kanth rijhavin sejh suhavin.

banh sirandi var gal lavin.main hikk sulan mari ve.

rutt sohani te vakat sukhele.angan sahele ghar alabele.

maikun vi rabb ranjhan mele.kisamat devam vari ve.

gul phul dhajara jorr dakhavim.bulabul bhaure khushiaan pavim.

val val hasarat marre aavim.pal pal chubhim katari ve.

ujjarre sihare har kumane.naz navaz de tol vahane.

guzare sare mane tarane.laggarri shahir khavari ve.

ratin nindar n denh karare.har har vele dar madare.

tol nihali dissadi dare.tatarri orrak hari ve.

banh churreli sikk sikk hutarri.gal n lave denda putharri.

pit kulalarri rit aputharri.ditharri yar di yari ve.

mahi mittharra gal na lavim.gane gahine khavan aavam.

bas gulan di sah munjhavam.sarre bad bahari ve.

darad andoh te rom kashale.soz pajjale akkhiaan nale.

shala yar farid sanbhale.talim munjh munjhari ve.